En la Brasilia ha il populist da la dretga, Jair Bolsonaro, gudagnà l'emprima runda da l'elecziun dal nov president. Suenter che 90% da las vuschs èn dumbradas ora survegn Bolsonaro radund 47%, uschia communitgeschan las autoritads d'elecziun.
Sin il segund plaz è il candidat da la sanestra, Fernando Haddad da la partida da lavur da l'anteriur president Luiz Inacio Lula da Silva. El vegn sin radund 28%. Bolsonaro e Haddad van en trais emnas en ina elecziun decisiva.
Las elecziuns valan sco success per Bolsonaro che vegn savens er numnà il «Donald Trump da la Brasilia». Las ultimas enquistas avevan anc previs, che Bolsonaro vegniss sin 36% da las vuschs. Il candidat da 63 onns ha dentant survegnì marcantamain dapli vuschs e mo per pauc munchentà la maioritad absoluta.
En la Brasilia èn 147 milliuns persunas stads clamads a l'urna per eleger in successur per il schef da stadi conservativ, Michel Temer. En tut èn 13 candidats sa mess a disposiziun per l'elecziun.
RR novitads 06:00