Siglir tar il cuntegn
cuntegn

Exteriur Brexit: Ils resultats da las votaziuns en Gronda Britannia

La decisiun davart il Brexit è crudada en favur da sortir da l’Uniun europeica. Las vuschs èn dumbradas e 51.9% dals Brits han votà per il Brexit. 48,1% vulevan restar en l'Uniun europeica.

In auto cun ina bandiera da la Gronda Britannia avant ina chasa cun ina bandiera da l'UE.
Legenda: La Gronda Britannia è dividida. La Scozia e l'Irlanda dal Nord vul restar, l'Engalterra ed il Wales sortir da l'UE. Keystone

La participaziun a las votaziuns è stada cun passa 70% fitg auta. Uschian han dapli che 33 milliuns persunas en Gronda Britannia dà giu lur vusch. Ils aderents da sortir da l'UE cuntanschan passa 17 milliuns vuschs. La gruppaziun da restar en l'UE ha cuntanschì in milliun pli paucas vuschs.

La Scozia vul restar en l’UE

En Scozia han radund 62% da las votantas e dals votants vuschà per restar en l'Uniun europeica. Quai procura gia per speculaziuns davart in nov referendum d'independenza dal pajais. La scheffa da regenza scotta Nicola Sturgeon ha ditg che la Scozia veglia restar en l'UE. Il resultat mussia ch'il pievel scot vesia ses futur sco part da l'Uniun europeica, ha ditg Sturgeon suenter la dumbraziun. In nov referendum da sortir dal reginavel da la Gronda Britannia saja tant sco segir, ha accentuà Sturgeon.

Pir 2014 aveva in referendum davart l'independenza fatg naufragi. L'anteriur schef da la regenza scotta Alex Salmond aveva ditg envers l'emettur BBC ch'el saja segir che Sturgeon veglia in nov referendum.

La Engalterra ed il Wales vulan il Brexit ed uschia sortir da l'UE l’Irlanda dal Nord vul tuttina sco la Scozia restar en l’UE.

Era la chapitala vuleva restar en l’UE

La citad da Londra ha cun gronda maioritad refusà il Brexit. Uschia eran bun 60% da las votantas ed ils votants da Londra per restar en l’Uniun europeica.

Ma la gronda part da la populaziun ha votà per sortir da l’UE quai suenter 43 onns commembranza.

RR novitads 06:00+