Siglir tar il cuntegn

Header

Trais muffins en ina conditoria. Tgenin prender, quel cun la bandiera scozzesa ni quel cun la britannica? Entamez il segn da dumonda.
Legenda: Referendum viceversa - la Scozia vul vegnir independenta da la Gronda Britannia. Keystone
cuntegn

Exteriur Brexit - L'Europa s'organisescha danovamain

A Berlin èn sa scuntrads ils ministers da l'exteriur dals 6 pajais fundaturs da l'UE per discutar las consequenzas dal Brexit. Il president da la cumissiun da l'UE, Jean Claude Juncker, quinta cun ulteriuras votaziuns da commembers per sortir da l’UE. La Scozia percunter vul restar en l'UE.

Berlin – inscunter dals ministers da l’exteriur dals 6 pajais fundaturs da l’UE

Ils 6 pajais fundaturs da l’UE, numnadamain la Germania, la Frantscha, l’Italia ed ils stadis da Benelux Belgia, Pajais Bass e Luxemburg na vulan laschar nagin spazi a dubis areguard l’avegnir da l’UE.

Walter Steinmeier sco minister da l’exteriur dal pajais ospitant ha fatg cler avant l’inscunter che «nus na laschain betg prender davent quest’Europa».

Steinmeier avant in guaud da microfons.
Legenda: Keystone
Nus na laschain betg prender davent quest’Europa a nus.
Autur: Frank-Walter Steinmeierminister da l'exteiur tudestg

En il sboz per ina decleranza da l'inscunter a Berlin vegn discurrì d'ina «uniun flexibla» che duai laschar spazi per pajais partenaris che na pon u na vulan anc betg far ulteriurs pass d'integraziun.

Brüssel – diplomat Seeuws tracta per l'UE cun la Gronda Britannia

L’UE vul prender per mauns uschia spert che pussaivel las tractativas cun la Gronda Britannia per sortir da l’UE. Il diplomat beltges Didier Seeuws è vegnì incumbensà da manar en il cussegl da ministers da l’UE l'uschenumnada Brexit-Task-Force. Seeuws è stà enfin il 2014 collavuratur pli stretg da l’anteriur president da l’UE, Herman Van Rompuy. Londra percunter na para insumma betg dad avair prescha cun sortir da l’UE.

A Brüssel quinta Juncker quinta il president da la cumissiun da l'UE, Jean Claude Juncker,cun auter referendums per sortir da l’UE. Quai saja pussaivel cun quai ch'ils populists na vegnan betg a manchentar quest'occasiun.

Jean-Claude Juncker taidla durant ina conferenza da medias attentivamain.
Legenda: Keystone
Populists na manchentan per regla nagina occasiun per propagar cun gronda canera lur politica anti-Europa.
Autur: Jean-Claude Junckerpresident da la cumissiun da l'UE

Scozia - la part dal nord da la Gronda Britannia vul l'independenza

Anc al medem di annunzia la Scozia in referendum. Ella na vul dentant betg vegnir independenta da l'UE ma da la Gronda Britannia. La regenza regiunala da la part dal nord da la Gronda Britannia, la Scozia, prepara in segund referendum per daventar independenta. Il 2014 avevan 55% dals Scots votà cunter l'independenza da la Scozia.

A la votaziun davart il Brexit aveva ina gronda maioritad dals Scots vuschà da restar en l’UE. Dentant eran 52 pertschient dals Brits per l’extrada.

RR novitads 14:00

Artitgels legids il pli savens