In ferm franc svizzer munta problems per l'economia d'export. La Gronda Bretagna è il 5avla impurtant pajais d’import per products svizzers, uschia per products da farma, uras sco er instruments da precisiun. Ma er il turissem patescha d’in ferm franc svizzer. Ma panica na saja il mument betg giustifitgada. La Svizra possia era viver cun in franc svizzer survalità.
Banca naziunala è intervegnida
Per reducì la valita dal franc svizzer ha la Banca naziunala svizra cumenzà a cumprar euros. Perquai è il curs dal franc tar l’euro puspè sa revegni sin 1 franc e 08 raps. Ma ch’ina sortida da la Gronda Britannia chaschunia turbulenzas era per l’expert da finanzas Ruedi Minsch nagina surpraisa. Ma il mender per la bursa sajan las malsegirtads, ha ditg Minsch il schef econom da economiesuisse.
Las malsegirtads frainan las investiziuns
Las turbulenzas a la bursa vegnian ad esser las pli grondas durant ils prims dis. Ma la malsegirtad politica haja era sco consequenza che las investiziuns en l’economia sa sminueschan. Las consequenzas per la Svizra vegnan ad esser damain plazzas da lavur novas ed ina pli flaivla conjunctura. Ma ils products d’import vegnan pli bunmartgads, ha ditg Minsch.
RR actualitad 12:00