Suenter il cler resultat per in Brexit en Gronda Britannia datti uss pliras dumondas avertas.
Tge fa David Cameron
La Gronda Britannia stat avant ina midada politica. Il primminister David Cameron che ha instradà la votaziun tar il referendum ha annunzià avant las votaziuns da vulair restar primminister era tar in gea al Brexit. Ma il mument èsi intschert quant ditg che Cameron po anc giudair il sustegn. Il squitsch vegn a s’augmentar era ord las atgnas retschas.
Uschia n’èsi era betg cler tgi che vegn a contractar sur d’ina sortida da la Gronda Britannia ord l’UE. Pliras medias speculeschan che quai vegn ad esser Boris Johnson. El che ha dà ina fatscha al Brexit.
Tge fa l’economia
La segunda gronda dumonda vegn ad esser, tge capita uss cun l’economia. Avant las elecziuns aveva ils adversaris dal Brexit adina pronunzià ch’ina sortida vegnia a purtar dapli dischoccupaziun e 100’000 plazzas vegnian ad svanir. Ina consequenza sa mussà gia en la perdita marcanta dal pfund britannic. Ils promoturs dal Brexit ston uss far adatg ch’il siemi da sortir da l’Uniun europeica na sa mida betg en in nausch siemi.
Tge fa la Svizra
Per la Svizra è l’annunzia dal Brexit en plirs cas in scenari plitost negativ. Il franc svizzer è savens en temps malsegirs ina valuta che vegn duvrada sco «port segir» quai ch’è gia capità. La banca naziunala vegn probabel a stuair intervegnir en il martgà, scrivan las medias. L’economia d’export svizra vegn era a stuair s’adattar a la situaziun nova, sco era il turissem. In ferm franc svizzer è surtut per il turissem ina nauscha novitad. Ed era la realisaziun da l’iniziativa d’immigraziun da massa, che sto vegnir contractada cun l’UE, è sut las novas circumstanzas betg propi vegnida pli simpla. Per Brüssel datti uss auters problems.
Helpline per dumondas
La Confederaziun ha endrizzà ina lingia da telefon per dumondas en connex cun il Brexit. Uschia survegnan burgais svizzers e interpresas scleriment sur da pussaivlas consequenzas. Il numer da telefon munta a 0800 24-7-365.
RR actualitad 08:00