Siglir tar il cuntegn

Header

Il maletg mussa Andrea Rauti-Wyser e Pascal Wyser
Legenda: Andrea Rauti-Wyser e Pascal Wyser lavuran per ina pitschna banca privata amez Londra. RTR/nc
cuntegn

Exteriur Brexit: «Nagin enconuscha propi las consequenzas»

In dals ferms arguments en Gronda Britannia per restar en l'Uniun Europeica è la tema da consequenzas economicas. Quai sentan era ils dus Tuatschins Andrea Rauti-Wyser e Pascal Wyser che lavuran per ina pitschna banca privata a Londra. Ils effects concrets d'in Brexit n'enconuscha dentant nagin.

I regia malsegirtad en il mund da l'economia a Londra, manegian ils dus Tuatschins. Blers clients s'infurmeschian e dumondian tge consequenzas ch'in Brexit avess. A quels cusseglia lur banca da simplamain far nagut e spetgar la votaziun da gievgia, ils 23 da zercladur.

In pfund flaivel n'è betg bun per la Svizra

Quitads fetschia il mument in zichel la glivra, il pfund (£), manegia Pascal Wyser che lavura dapi dus onns a Londra e fa dasperas anc in studi d'economia e da finanzas: Tar in Brexit daventass la glivra pli flaivla e cunquai il franc svizzer pli ferm. Quai fiss natiralmain gist il cuntrari da quai che l'economia ed il turissem svizzer dovran.

audio
Mezdi: Brexit - la vita professiunala amez il sectur da finanzas
05:14 min, Actualitad dals 23.06.2016.
laschar ir. Durada: 05:14 minutas.

Mo era persunalmain spetgan ils dus sursilvans cun tensiun la votaziun sche la Gronda Britannia duai restar en l'Uniun Europeica u sortir. Schegea ch'els èn persvas che la plazza da finanzas da Londra dovra persunas da l'exteriur per pudair surviver, fa in pussaivel Brexit in zichel mal il venter: Bancas che na rendan betg na dovran betg uschè blers lavurers da pajais esters. Ed: quellas bancas pudessan transferir lur sedia en autras metropolas sco per exempel a Frankfurt, di Andrea Rauti-Wyser che viva dapi tschintg onns a Londra.

RR Actualitad 12:00

Artitgels legids il pli savens

Scrollar a sanestra Scrollar a dretga