Brexit-portavusch Farage sa retira

Nigel Farage il schef da la partida conservativa da dretga britannica «vul enavos sia vita».

Nigel Farage communitgescha sia demissiun

El veglia enavos sia vita, quai saja la raschun ch'el sa retiria sco schef da la partida conservativa United Kingdom Independence Party Ukip. Quai ha communitgà Farage ad ina conferenza da medias. El haja cuntanschì la finamira da sia vita - numnadamain che la Gronda Britannia sortia da l’Uniun Europeica.

«  Jau hai accumplì mia missiun.  »

Nigel Farage
President da la Ukip

Farage ha però punctuà ch'el vegnia a restar commember da sia partida e sustegnair il cumbat politic da quella. Dapi il 2010 è el stà timun da la Ukip. Dasper l'anteriur burgamester da Londra è Farage stà il pli impurtant portavusch dals adherents per il referendum da l'UE ils 23 da zercladur. 52% dals Brits avevan vuschà per ina sortida da l'UE.

Pir avant intgins dis aveva Johnson annunzià ch'el desistia dad ina candidatura per l'uffizi da primminister.

«  La decisiun da Farage è sin segn da timiditad. »

Jean Asselborn
minister da l'exteriur dal Luxemburg

La demissiun da Nigel Farage ha provocà reacziuns per part massivas. Il miniter da l’exteriur dal Luxemburg Jean Asselborn discurra d’ina decisiun temelitga. Ella mussia ch’ins na dastgia betg crair ad opportunists politics.

Sin Twitter vegn la demissiun da Farage commentada cun tun da beffa e per part cun pleds nauschs. Tranter auter èsi da leger d’ina suppa ch’el laschia ussa magliar ora auters.

RR novitads 12:00 / 16:00