May vegnia be a suttametter la cunvegna al parlament l'autra emna, sch'i sa mussia avunda sustegn, ha la primministra scrit en ina brev a deputadas e deputads. Uschiglio stoppia la Gronda Britannia dumandar l'Uniun europeica da stuschar in'ulteriura giada la sortida. Lura stuess la Gronda Britannia era sa participar a las elecziuns europeicas.
Ier eran l'UE e May sa cunvegnids da stuschar il termin per extrar da l'UE almain sin ils 12 d'avrigl. Il plan: sche la chombra pitschna approvescha l'autra emna la cunvegna, sche lura duaja la Gronda Britannia sortir ils 22 da matg. Sche quai na gartegia betg, vul l'UE che la Gronda Britannia preschentia fin ils 12 d'avrigl novas propostas.
Oriundamain leva la Gronda Britannia sortir ils 29 da mars 2019 da l'UE. Lez termin n'è betg pli realistic. Il parlament britannic n'è betg perina en la debatta da Brexit.
4 milliuns Brits èn per l'exit dal Brexit
Ina petiziun online che vul che la Gronda Britannia restia en l'UE dumbra gia 4 milliuns suttascripziuns. En la Gronda Britannia sto il parlament britannic resguardar tuttas petiziuns cun passa 100'000 suttascripziuns.
RR novitads 12:00