Siglir tar il cuntegn

Header

Schuldada e persunas en ina staziun.
Legenda: Brüssel - In di suenter las attatgas da terror: L'armada e la polizia è pli preschenta ma la citad vul mussar ch'ella viva anc. Keystone
cuntegn

Exteriur Brüssel: In di suenter ils attentats

A Brüssel regia malencurada e il pli aut avertiment d’acts da terror. La vita publica en la chapitala da la Belgia ha cumenzà ruassaivel dentant era tendì. La gronda part dal traffic public cursescha in di suenter las attatgas puspè normal.

La gronda part dal traffic public è puspè cursada la mesemna en damaun. L'eroport da Brüssel resta dentant serrà. Previs èsi era ch'instituziuns uffizialas, scolas e centers da cumpra avran puspè.

La citad vul mussar ch'ella vivia, era sch’ella è vegnida tutgada entamez ses cor, communitgeschan las autoritads da la citad. La mesemna da mezdi han las autoritads annunzià da far ina minuta da silenzi a Brüssel. Fin la gievgia vala era ina malencurada naziunala.

Bler è gia fitg normal a Brüssel

En la citad da Brüssel ha in di suenter ils attentats gia fitg bler funcziunà normal, di il correspundent da SRF a Brüssel, Sebastian Ramspeck. Ils blers sajan era gia ids a lavurar.

La mesemna a bun’ura eran las vias fullanadas cun autos sco adina. Ma i n’è betg vegnì tibà en il traffic, di Sebastian Ramspeck. Quai saja insatge fitg nunusità, sch’ins enconuschia il traffic a Brüssel. Probablamain prendi la glieud a Brüssel tut en zic pli ruassaivel che usità.

Glieud va enturn different cun situaziun

Las scolas u las stizuns hajan per gronda part gì avert. Auter vesia quai perencunter ora tar il traffic public. Là dettia quai anc inqual restricziun. Tranter auter è l’eroport anc adina serrà.

Tema, gritta u quietezza. La glieud a Brüssel va enturn different cun la situaziun actuala. Quai ha Sebastian Ramspeck constatà durant discurs cun schurnalists, cun amis u cun passants sin via.

Ramspeck di dentant che la populaziun saja bunamain disada che blera polizia e schuldada sajan en la citad. Quai saja numnadamain gia il cas dapi ils attentats dal november a Paris.

Inscunter spezial da l'UE

Pervi dals attentats duai dar en curt in inscunter spezial dals ministers da l'UE ch'èn responsabels per la segirtad interna. Sco il presidi ollandais dal cussegl da l'UE communitgescha, pudess quel gia vegnir organisà damaun gievgia, ils 24 da mars 2016.

La Belgia ha supplitgà per in tal inscunter. L'Ollanda - che presidiescha actualmain il cussegl da l'UE - prepara quel. In sumegliant inscunter spezial avevi gia dà suenter ils attentats da Paris il november passà.

Campiunadis europeics da ballape n’èn betg periclitads

Malgrà las attatgas terroristicas a Brüssel ed a Paris na vul la Frantscha betg periclitar ils campiunadis europeics da ballape la stad proxima. Quai ha communitgà il secretari da sport franzos. Cun annullar ubain spustar il turnier dess'ins raschun als terrorists. Er l'UEFA na vesia betg in motiv d'annullar il campiunadi d'Europa.

En vista a la situaziun da terror actuala daventa il campiunadi d'Europa in spectacul che basegna fermas mesiras da segirtad. Ils policists na dastgan betg far vacanzas durant la stad. En la vischinanza dals stadions duai dar controllas sco sin in eroport. Gieus senz'aspectaturs na sajan tenor l'UEFA actualmain dentant betg in tema.

RR novitads 11:00 / 16:00

Artitgels legids il pli savens

Scrollar a sanestra Scrollar a dretga