Siglir tar il cuntegn
cuntegn

Exteriur Brüssel: Stgalim da l’alarm da terror resta sin pli aut nivel

La Belgia ha prolungà il stgalim d'alarm da terror il pli aut per Brüssel. Quai ha annunzià il primminister Charles Michel suenter ch'il cussegl da segirezza naziunal è sa radunà. Dentant duain las scolas e la metro a Brüssel avrir puspè plaun a plaun a partir da mesemna, sco Michel ha agiuntà.

Er oz patrugliavan schuldada beltga per las vias da Brüssel.
Legenda: Er oz patrugliavan schuldada beltga per las vias da Brüssel. Keystone

A Brüssel resta l'alarm da terror vinavant sin il stgalim 4, il pli aut nivel pussibel. Quai almain enfin glindesdi proxim, ha ditg il primminister beltg, Charles Michel. Las scolas e la metro en la chapitala da la Belgia duain dentant avrir puspè plaun a plaun a partir da mesemna.

Arrestà quart suspectà

Entant ha la polizia da la Belgia arrestà in quart um suspectà da terrorissem. L'um duai esser involvì en las attatgas da Paris. Ad el vegnia rinfatschà da far part d'ina gruppa da terror e d'avair participà ad in act terroristic, communitgescha la procura publica da la Belgia. La polizia aveva piglià l'um ier saira tar ina razzia a Brüssel. 15 persunas ch'eran medemamain vegnidas arrestadas èn uss puspè libras. E duas da las 5 persunas arrestadas oz da la polizia beltga èn era puspè libras.

RR novitads 20:00