Il terratrembel saja stà da sentir a las 20:19 (temp local) en ina regiun da desert, radund 17 km davent da la citad Ridgecrest. Gia la gievgia avevi dà en la medema regiun in terratrembel da la fermezza 6,4. La segunda stremblida è stada en ina profunditad da mo 900 m ed ha gì ina fermezza da 7,1 sin la scala da Richter. L'emprim era anc vegnì discurrì d'ina fermezza da 6,9.
Tenor l'agentura da novitads AP è il terratrembel stà da sentir almain per ina mesa minuta. Er en las metropolas Los Angeles e Las Vegas sco er en parts dal Mexico han ins anc sentì a stremblir la terra. Davart ils donns ed eventualas unfrendas pervi dal terratrembel, n'han las autoritads anc betg fatg indicaziuns pli concretas. Ils pumpiers dal district Kern County han dentant rapportà da blers telefons da glieud tementada. En pli sajan ruts ora fieus.
Las autoritads quintan ch'i pudess anc dar dapli terratrembels ils proxims dis. Ch'i dettia in anc pli ferm terratrembel na saja betg probabel, dentant er betg exclus, ha ditg ina seismologa da l'observatori da terratrembels.
Paucs donns tar emprim terratrembel
Tar il terratrembel da la gievgia èn be paucas persunas vegnidas blessadas e duas chasas han prendì fieu, perquai che lingias da gas èn ruttas. En pli hai dà stgarps en pliras vias.
L'ultima giada ch'igl ha dà en il desert da Mojave in terratrembel talmain ferm è stà il 1999. Tar quel n'avevi strusch dà donns. In propi ferm terratrembel cun unfrendas avevi però dà avant 25 onns a Los Angeles. Tar il terratrembel Northridge il 1994 cun ina fermezza da 6,7 eran 57 persunas mortas. Il terratrembel aveva chaschunà donns da milliuns.
RR novitads 07:00