Cameron ha ditg adia a Brüssel

Il primminister da la Gronda Britannia David Cameron ha tar ses ultim inscunter suprem da l’Uniun europeica deplorà la decisiun da ses pajais da sortir da l’UE. Da dumandar il pievel sajan dentant stà la dretga decisiun. Anc avert è cura che la Gronda Britannia inoltrescha la dumonda da demissiun.

David Cameron. Bild in Lightbox öffnen.

Legenda da maletgs: A Brüssel spetgan l'UE sin la dumonda uffiziala d'admissiun da la Gronda Britannia. Keystone

David Cameron ha tar sia ultima conferenza da medias a Brüssel accentuà la tenuta positiva tar l’inscunter suprem da l’Uniun europeica. Las discussiuns sajan constructivas e ruassaivlas, ils stadis hajan demussà chapientscha per la decisiun dal pievel brit, ha ditg Cameron. La dumonda sch’el deploreschia las votaziuns, ha el respundì ch’el deploreschia la decisiun dal pievel ma betg las votaziuns sco talas, uschia Cameron.

Spetgar sin dumonda uffiziala

A Brüssel spetgan ins uss sin la dumonda uffiziala da demissiun da la Gronda Britannia. Uschè ditg ch’ina tala dumonda manca na pon ils 27 ulteriurs stadis commembers betg decider co reglar uss las relaziuns cun la Gronda Britannia. Quai chaschuna malsegirtad entaifer l’UE ma er entaifer l’entira communitad globala.

Oz mesemna vegnan ils 27 stadis commembers restants da l’UE a s’inscuntrar tar in sesida infurmativa. Decisiun na vegnan anc betg spetgadas. Ils stadis vulan surtut demonstrar unitad.

RR novitads 06:00