Siglir tar il cuntegn
cuntegn

Exteriur Cas Böhmermann: Segund chanaster per Erdogan a Cologna

Il tribunal superiur da Cologna ha refusà il plant dal president tirc Recep Tayyip Erdogan, encunter il schef da la chasa editura Axel-Springer, Mathias Döpfner.

purtret da Jan Böhmermann en il studio da televisiun
Legenda: Jan Böhmermann: Il satiricher tudestg ch'aveva agità il president tirc cun sia poesia disfamanta. Keystone

Uschia ha il tribunal confermà la decisiun da l’instanza precedenta. Döpfner saja s’exprimì en il senn da la libertad d’opiniun, argumentescha il tribunal superiur.

Döpfner aveva publicamain sustegnì il satiricher tudestg Jan Böhmermann ch'aveva scrit ina poesia disfamanta encunter il president tirc. Silsuenter aveva Erdogan purtà plant tant cunter Böhmermann sco er cunter Döpfner.

Cunter la decisiun dal tribunal superiur na datti nagin med legal. Tenor il tribunal pudess il president tirc sil pli anc far in recurs constituziunal.

RR novitads 15:00