Siglir tar il cuntegn

Exteriur Cas Skripal: investigaders spetgan sin rapport da la figlia

En il cas da l'attatga da tissi sin il spiun dubel Sergej Skripal e sia figlia Julia, spera la polizia uss sin infurmaziuns da Julia.

  • A Julia Skripal vai puspè meglier. Ins spera ch'ella possia dar infurmaziuns a la polizia.
  • Sergej Skripal sa chatta vinavant en in stan critic, ma stabil.
  • Ins suppona ch'els èn vegnids tissientads cun Nowitschok.

Bunamain quatter emnas suenter l'attatga da tissi sin ella e ses bab vai a Julia Skripal tenor la clinica gia bler meglier. La dunna da 33 onns possia puspè magliar e baiver, rapporta l'emmetur Sky News. Ses bab è anc adina en in stan critic, dentant stabil. Uschia spera la polizia ch'ella possia dar infurmaziuns davart l'attatga e per exempel sclerir la dumonda, schi ses bab, il spiun dubel Sergej Skripal, ed ella sajan gia vegnids persequitads avant l'attentat.

Ils 4 da mars eran ils dus vegnids chattads sin in banc en in parc a Salisbury – senza schientscha. Ils investigaders supponan ch'els sajan vegnids tissientads cun Nowitschok, in tissi sviluppà en l'anteriura uniun sovietica. Ins haja chattà quel tissi sin il mauns da las unfrendas. Londra inculpescha perquai la regenza sco instigader da l'attatga. Moscau refusescha però las renfatschas.

Tissientads vid l'atgna porta

Tenor l'emmetur BBC han ins chattà fastizs da la substanza da tissi vid l'isch chasa dals Skripals. Tscherts vischins, postins ed investigaders vegnan uschia observads, cunquai ch'era els èn forsa vegnids en contact cun la substanza.

RR novitads 14:00