La partida regenta ha furmà ensemen cun in'ulteriura partida e cun moviments da burgais in'allianza dals separatists. A la testa da questa è Artur Mas. Per pudair iniziar la separaziun, ston Mas ed ils adherents dalla separaziun vegnir elegì en il parlament regiunal dalla Catalugna. Gudognan els ina majoritad dals 135 mandats en il parlament, vulessen els manar la regiun fin il 2017 en l’independenza.
Regenza spagnola sa dosta
La regenza spagnola na vul betg laschar tiers quai. La Catalugna è numnadamain la pli ferma regiun economica dal pajais. Il schef da la regenza spagnola, Mariano Rajoy, di che l' unitad da la naziun spagnola na dastgi betg vegnir schliada, quai stettia en la lescha. El franeschia las emprovas da la Catalugna da la dretgira constituziunala, smanatscha Rajoy.
Gia il november passà ha la dretgira constituziunala franà la Catalugna e si'emprova da vegnir independenta. Da principi na saja betg illegal da far in stadi independent, dentant gaja quai sulet cun in dialog e cun la lubientscha da la regenza spagnola.
Var 5,5 milliuns persunas pon ir oz a l'urna ch'èn avertas fin las 20:00 la saira. Calculaziuns approximativas na datti naginas, entant datti enquistas dals electurs e sin fundament da questas datti lura prognosas.
RR novitads 12:00