Il schef da la regenza catalana Carles Puigdemont ha calmà la regenza regiunala da la Catalugna ad ina sesida extraordinaria. La sesida haja lieu davos portas serradas, rapportan medias spagnolas.
La Catalugna pudessia perder il status sco regiun autonoma da la Spagna, smanatscha il minister da giustia spagnol. Quai pudessi capitar sche la Catalugna annunzia l'independenza da la Spagna. Madrid vegnia a s'engaschar cun tutta forza per la lescha, uschia il minister da giustia. Cun quai perdiss la Catalugna l'independenza regiunala.
Da las 5,3 milliuns Catalanas e Catalans sajan stads la dumengia 2,26 milliuns (42,3%) a votar en il referendum dispitaivel davart l’independenza da la Catalugna da la Spagna. Quai ha fatg a savair la regenza ed ha accentuà anc la saira da la votaziun, che quella saja stada in success.
«Jau avess votà cunter l’independenza»
Quai di Sylvia Deplazes-Orobitg. Ella è naschida en Svizra, ses geniturs èn Catalans. Ella ha tuts dus pass. Ils geniturs èn turnads en lur patria e vivan circa in’ura davent da Barcelona.
Cunquai ch'i na saja betg stà ina votaziun uffiziala, n’haja ella betg pudì sa participar. Sylvia Deplazes avess votà cunter l’independenza, cunquai ch’ella è da l'avis che la Catalugna na possia betg surviver economicamain senza il sustegn da la regenza spagnola. Ella spera che la situaziun sa calma bainprest e ch’il prim-minister Mariano Rajoy midia opiniun.
Curs da l'euro influenzà da referendum
Da fertant hajan er reagì las bursas sin il svilup en Catalugna: Al cumenzament dad ina nova emna haja il referendum d'independenza indeblì l'euro, rapportescha l'agentura da novitads tudestga DPA. L'euro è crudà dad 1,18 dollars sin 1,1775 dollars. La banca centrala europeica EZB aveva francà il tschains da referenza il venderdi suentermezdi sin 1,1806 dollar.
Spagna: Votaziun illegala
Tenor sentenzia da la dretgira constitutiva spagnola saja la votaziun illegala. Perquai ha er il minister president spagnol Mariano Rajoy ditg, che la votaziun na saja in nagina furma valaivla. El ha numnà la votaziun ina inscenaziun.
Catalugna: Lescha permetta separaziun
Ils Catalans percunter sa refereschan ad ina «lescha da separaziun», ch’è vegnida deliberada dal parlament regiunal a Barcelona. Tenor quella lescha po la regenza regiunala proclamar entaifer 48 uras davo la votaziun l’independenza da la Catalugna.
Dumengia da votaziun violenta
Madrid aveva tramess 4’000 policists per impedir las Catalanas e Catalans dad ir a votar. Ils conflicts tranter policists e votantas e votants èn escalads vers la dumengia a mezdi en acts violents. Ils policists spagnols han prova da metter tras lur cumond cun projectils da gumma e bastuns. Tenor il ministeri da sanadad da la Catalugna èn vegnidas feridas 893 persunas. Tenor la polizia haja dat 33 policists. Ils maletgs da las scenas tumultusas e persunas civilas feridas èn ids enturn il mund.
Per il mardi han tozzels da sindicats ed organisaziuns clamà ad in chauma generala.
RR novitads 06:00
