Siglir tar il cuntegn

Header

cuntegn

Catastrofa da terratrembel Commemoraziun da las unfrendas ad Amatrice

En la citad taliana Amatrice èsi vegnì commemorà la notg passada a las unfrendas da la catastrofa da terratrembel avant 3 onns. En la regiun da l'Italia centrala eran mortas ils 24 d'avust 2016 tut en tut 299 persunas, 249 da quellas ad Amatrice. L'entira citad è vegnida destruida, pliras 10'000 persunas èn stadas senza tetg.

Precis a las 3:36, cura che la terra aveva strembli avant trais onns, han tutgà ils zains ad Amatrice. Latiers èsi vegnì prelegì ils nums da las unfrendas e per mintgina hai dà in sun dal zain.

Lavurs da reconstrucziun duran

Er trais onns pli tard va la reconstrucziun da la citad mo plaun vinavant. Tuttas famiglias pertutgadas han obtegnì ina pussaivladad d'abitar, pliras fatschentas, ustarias e scolas èn puspè vegnidas avertas. La reconstrucziun dal center istoric d'Amatrice vegn dentant anc a durar plirs onns. Ils donns da la catastrofa vegnan stimads cun 23 milliardas euros.

Obstachels tar la reconstrucziun

Las ruinas sajan per gronda part vegnidas manads davent, els hajan dentant pers lur identitad. Quai ha ditg il president communal dad Amatrice, Antonio Fontanella. Obstachels da birocrazia engrevgeschan era las lavurs da reconstrucziun. La populaziun sa sentia laschada en la merda. A Roma manchia ina persuna da contact che coordineschia la reconstrucziun.

Ord l'archiv RTR

Il Minisguard fa da savair pertge ch'i dat insumma tals terratrembels e rapport d'in um che guarda dals animals en las ruinas dad Amatrice.

RR novitads 11:00