Siglir tar il cuntegn

Header

fluras e motto da solidaritad "je suis charlie"
Legenda: L'attatga da terror dals 7 da schaner aveva procurà per in'unda da solitaritad en l'entir mund. Keystone
cuntegn

Exteriur Catastrofas capitan e vegnan emblidadas

Oz avant in onn è stà l'act terroristic sin la redacziun da satira Charlie Hebdo. Entant n'è l'act terroristic strusch pli tema. Emblidain nus tut quels eveniments?

La psicologia da medias a l’Universitad da Turitg s’occupa exact cun da quests temas. In dad els è Martin Wettstein. Tenor el n'emblidain nus betg quels eveniments, mabain nus na dain simplamain cun il temp betg pli uschè ina gronda prioritad a l'eveniment.

Mintga di vegnin nus a savair numerusas novitads ed uschia perdan las veglias novitads adina dapli lur impurtanza. Dal tut n'emblidain nus dentant mo darar gronds eveniments. Uschia san ils blers anc, nua ch'els eran e co els èn vegni a savair dad in grond eveniment sco ils attentats da New York u da Charlie Hebdo.

In tema è mo uschè ditg interessant sco quai ch'i dat novas

Gronds temas san ins, tenor Martin Wettstein, era tematisar durant dis ni schizunt emnas. Dentant funcziuna quai mo, sche igl dat era adina puspè novas infurmaziuns ubain novs aspects. Sche quai n'è betg pli il cas daventa il tema lungurus.

Uschia po i esser, che las medias na rapportan tuttenina betg pli dals problems da fugitivs mabain da la mancanza da naiv. Quai pervi ch’ins ha gia udì massa bler dals fugitivs e vuless udir insatge nov. Il problem cun ils fugitivs n'è betg schlià ma tuttina nagin tema pli.

Medias san influenzar temas – ma betg tut ils temas

Tenor il psicolog da medias, Martin Wettstein, han las medias ina gronda influenza sin ils temas che la societad ha. Quai as numna “Agenda Setting”. Las medias san influenzar cura che la glieud s’occupa cun in tema. Dentant na po ina gasetta betg far quai suletta.

Pir cur che pliras medias rapportan il medem mument d’in tema, vesa la populaziun quest tema sco grond ed impurtant. In singul medium po mo darar procurar per uschia in grond hype sco che quai è il cas tar in attentat, malsognas ni tar ils problems cun fugitivs.

RR actualitad bunura 06:00

Artitgels legids il pli savens

Scrollar a sanestra Scrollar a dretga