Reto Ineichen è advocat da dretg e docent per dretg da turissem a la scol'auta da Lucerna, e declera tge ch'è da resguardar en suandantas situaziuns:
Sche l'organisatur da viadis stritga il viadi
Da principi ha il consument u la consumenta il dretg sin in'alternativa. Sche quella custa dapli, lura sto l'organisatur pajar.
Pia: ins ha almain da bun da survegnir enavos ils daners ch'ins ha pajà per il viadi. Per viadis pauschals vala: enavos ils daners u ina alternativa. Sch'ins cudeschescha sez las vacanzas, lura dependia dal pajais. En ils pli blers pajais retschaivan ins dentant era puspè enavos ils daners. Ina alternativa na stoppia in hotel per exempel betg porscher.
La catastrofa da natira capita durant il viadi
Sch'i dat ina catastrofa da natira durant in viadi, lura saja quai forza superiura. Sco l'advocat Ineichen di, saja la responsabladad lura tar l'osp. Tals eveniments na possian ins gea er betg prevesair sco organisatur.
Organisaturs da viadi èn obligads da sustegnair las persunas al lieu.
Quai vul per exempel dir: organisar in transport, in auter lieu da star sur notg u il viadi enavos a chasa. Ils custs per quests servetschs porta dentant da principi l'osp. Tscherts organisaturs da viadis èn dentant en talas situaziuns extremas culants envers ils osps, e surpiglian ina part u perfin tut ils custs.
En in cas da crisa vali da chattar schliaziuns ed organisar. En uschia in cas hajan ins pli simpel sch'ins ha cudeschà tut sur ina organisaziun da viadis, che sch'ins organisescha sez il viadi ed emposta sgol, hotel etc. separà. Cunzunt lura sch'i è in viadi cun pliras destinaziuns.
Tge paja l'assicuranza da viadi?
Donns pervia da forzas superiuras n'èn per regla betg cuvrids, di Reto Ineichen. Ils custs per in albiert da remplazzament u in sgol enavos a chasa pajan tschertas assicuranzas dentant per part. Perquai sa rendia da s'infurmar davart las premissas.