Siglir tar il cuntegn

Header

video
Hurican «Ida» ha gia passà il Cuba
Or da News-Clip dals 28.08.2021.
laschar ir. Durada: 50 Secundas.
cuntegn

Center american da huricans «I smanatscha in fenomen da la natira catastrofal»

Sin sia via en direcziun da la Costa dal Golf americana daventa il stemprà «Ida» adina pli ferm.

Il stemprà vala da nov sco hurican da la categoria 4 da 5. Quai ha communitgà il Center naziunal da huricans. «Ida» duaja cuntanscher fermezzas da vent d’enfin 215 kilometers per ura. Il stadi federativ da Louisiana ed er la citad da New Orleans stoppian quintar cun ferma plievgia, mar burascusa e suffels desastrus. La forza electrica pudess crudar or per in lung temp. Il guvernatur da Louisiana ha proclamà il stadi d’urgenza e mobilisà la garda naziunala. Millis da persunas èn en fugia dal stemprà.

Ospitals na pon betg evacuads

Malgrà il privel na possian ils ospitals en vischinanza da la costa betg vegnir evacuads. Là vegnian numnadamain tractads memia blers pazients da Covid. Quels na possian per mancanza da capacitads betg vegnir transferids en auters ospitals, han declerà las autoritads. Gist avant 16 onns aveva il «Hurricane Katrina» devastà la citad da New Orleans. Radund 1’800 persunas eran mortas.

Privel dad ina «catastrofa cun dimensiuns istoricas»

Tant ils vents ferms che sajan prognostitgads, la plievgia intensiva sco er la mar burascusa sajan mintgin per sa sez gia fitg privlus, ha ditg il directur dal center naziunal da hurricans, Ken Graham envers l'emettur da televisiun CNN. Pertutgada vegnia ad esser la costa da Louisiana ma era il stadi vischins Mississippi. Graham ha appellà a tut ils abitants e las abitantas da questa regiun dad ir en segirtad. I smanatschia in fenomen da la natira catastrofal cun dimensiuns istoricas.

RTR novitads 11:00

Artitgels legids il pli savens