- Il ferm ciclon «Idai» ha laschà crescher ils flums en il center dal Mosambic uschè ferm, ch'igl ha dà mars internas.
- Probablamain èn milliuns da persunas en il Mosambic ed ils pajais vischins Simbabwe e Malawi pertutgadas da la catastrofa.
- Las autoritads dal Mosambic quintan che fin 1'000 persunas pudessan esser mortas en consequenza dal ciclon.
- Pervi da las inundaziuns severas ha la regenza dal Mosambic declerà il stadi d'urgenza.
- Tenor meteorologs poi anc fin gievgia plover fermamain en la regiun.
La notg sin il venderdi passà ha il ciclon «Idai» tutgà nà da l'Ocean Indic il pajais Mosambic cun vents da 160 km l'ura. Suandadas èn mars burascas ed inundaziuns massivas. Surtut la regiun enturn la citad gronda Beira è vegnida donnegiada fermamain.
In pledader da la Crusch Cotschna ha declerà, che gidanters al lieu discurrian da lieus che stettian fin 6 meters sut aua. Tenor l'organisaziun pudessan radund 400'000 persunas esser temporarmain senza suttetg.
La catastrofa pertutgia probablamain milliuns da persunas en il Mosambic ed en ils pajais vischins Simbabwe e Malawi. Quai ha ditg il manader dal biro d'agid d'urgenza da l'ONU, Jens Laerke. Els dovrian uss tut il sustegn logistic ch'els possian survegnir.
Legenda:
Surtut fermamain pertutgada è la regiun enturn la citad gronda Beira.
SRF
RR novitads 06:00