Situaziun medicinala
Il problem grond è ch'ils gronds centers medicinals èn betg pli en funcziun. Grondas parts da la populaziun n'han betg access als ospitals ch'i dat anc. Quai è er in grond problem: malsognas rumpan or, sco per exempel colera, difteria u virustgel. Quellas malsognas pon esser mortalas. Uschia èn ospitals d'organisaziuns d'agid fitg necessaris.
Igl è betg simpel d'importar medicaments en il Jemen – ma igl è pussaivel, l'agid vegn al lieu.
Erika Widmer
coordinatura medicinala tar MSF
Situaziun da scolaziun
Ina gronda part da l'infrastructura è donnegiada, blers scolasts na survegnan betg ina paja, las classas schloppan e material da scola manca. I saja dentant gist uss durant la guerra fitg impurtant da mantegnair scolas. Pertge quella generaziun che duaja vegnir scolada uss è la generaziun che duaja in di suenter la guerra puspè bajegiar si la terra. Plinavant èn scolas in lieu d'educaziun, in lieu da segirtad mo er in lieu da vegnir a frida cun quai ch'è passà per ils uffants.
Igl è uss immens impurtant d'investir en il sistem d'educaziun.
Larissa Alles
coordinatura da Save the Children en il Jemen
Motto: Gidar nua ch'igl è pussaivel
- Nua? Las organisaziuns umanitaras èn activas en l'entir Jemen (en territoris occupads dals rebels «Huthi» sco er en territoris dals «Loialists»), cunzunt dentant en il vest da la terra.
- Co organisà? Per il solit vegn l'agid sur la mar en las citads da port Aden/Hodeida u sur l'aria en la chapitala Sanaa.
- Co pussaivel? Ils collavuraturs da las organisaziuns stattan en contact cun las gruppas armadas per sa cunvegnir co e cu els dastgan furnir medischina u vivonda. Ils autos che vegnan charrads da organisaziuns èn signalisads e uschia per omaduas partidas da la guerra enconuschents.
RR actualitad 08:00