En il Portugal èn tar grevs incendis da guaud almain 62 persunas mortas e passa 50 persunas sajan blessadas, quai rapporta l'emettur da radio TSF sa referind sin indicaziuns dal ministeri dal intern dal Portugal. Las bleras persunas mortas eran sin la fugia en lur autos, cura ch’il fieu ha bloccà la via ad els, conferman las autoritads.
Entant èn parts da l'incendi sut controlla. Las temperaturas autas, l'extrema sitgira ed ils ferms vents en la regiun engrevgeschian dentant anc adina las lavurs da stizzar.
Plirs vitgs en privel
Plirs vitgs sajan circumdads dal fieu. Il schef dal stadi Marcelo Rebelo de Sousa è la notg sgulà tar il lieu da l'incendi. El ha discurrì d'ina situaziun senza exempel. Era il primminister ha declerà ch'el saja schoccà da la dimensiun da la catastrofa. Il Portugal ha decretà trais dis da malencurada naziunala suenter l'incendi da guaud.
Agid era da la Frantscha e la Spagna
Radund 700 pumpiers, passa 200 autos da pumpiers e dus aviuns èn tenor las autoritads il mument en acziun per cumbatter las flommas. Agid en furma d'aviuns da stizzar arriva era ord la Frantscha e la Spagna. Quai suenter che Portugal ha dumandà la coordinaziun d'agid d'urgenza da l'UE per sustegn.
Era il cusseglier federal svizzer Didier Burkhalter ha condolà al minister dal extern da Portugal Augusto Santos Silva cun in sms ed empermess la solidaritad da la Svizra cun il Portugal.
Incindi rut ora pervia d'in chametg
Sco la polizia da Portugal ha intant communitgà, haja in chametg chaschunà il fieu . La sonda suentermezdi, cura che l’incendi da guaud è ruts ora, haja dà in urizi senza plievgia sur la regiun.
L'incendi da guad è en il center dal pajais en la regiun da Leiria, datiers da Pedrógão Grande radund 100 kilometers en il nordost da Lissabon. Sin 128 kilometers quadrat vivan là radund 4000 persunas. La gronda part d'els viva da l'agricultura e da l'industria da textilias.
RR novitads 06:00++