Per il chancelier austriac Sebastian Kurz è la pandemia da corona quasi finida per persunas vaccinadas. En in'intervista cun la televisiun ORF ha Kurz exclus in nov lockdown per la glieud vaccinada.
Virus resta segir anc 10 onns
Sch'il sistem da sanadad vegnia anc ina giada sut gronda pressiun, lura vegnian per exempel l'access a la gastronomia da notg u occurrenzas grondas bloccads, dentant sulet per persunas betg vaccinadas. I saja cler, che mintga persuna betg vaccinada vegnia a pigliar il coronavirus pli baud u pli tard, ha il chancelier austriac ditg en l'emissiun dal ORF. La quarta unda da Corona vegnia segir betg ad esser la davosa: «Il virus vegni anc a dar en diesch onns.» I saja dentant fitg grev da prevesair il proxim andament da la pandemia.