Belafonte è vegnì enconuschent cun chanzuns sco il hit da calypso «Banana Boat Song». El ha giugà en passa 40 films ed è s'engaschà politicamain. A la vart da Martin Luther King Jr. ha el cumbattì per ils dretgs dals nairs en ils Stadis Unids, cun Nelson Mandela ha el cumbattì l'apartheit en l'Africa dal Sid e sco amassadur da l'Unicef è el s'engaschà per uffants a Haiti ed en il Sudan.
Belafonte ha gudagnà in Oscar d'onur e numerus auters premis. A favur da ses 90avel anniversari ha sia patria New York perfin numnà ina biblioteca a Harlem suenter el. 1927 è Belafonte naschì en quest quartier, ha dentant passentà ina gronda part da sia giuventetgna en la patria giamaicana da sia mamma.
Gugent fiss el daventà «l'emprim Hamlet nair», so el ha ina giada ditg en ina intervista. Enstagl èsi vegnì films sco «Bright Road» (1953) e «Carmen Jones» (1954). La musica è lura vegnida vitiers ed uschia è el daventà il «Calypso King».