En il Panama han investigaders perquirì la chanzlia d’advocat Mossack Fonseca. Da questa chanzlia derivan ils uschenumnads «Panama Papers». Ils investigaders intercureschian sche la chanzlia saja involvida en activitads illegalas, ha communitgà la procura publica a Panama-City.
Renfatscha da betg cooperar
A la chanzlia d’advocat vegn renfatschà d’avair fundà firmas da chascha nua che politichers e prominents da l’entir mund hajan zuppà lur facultad.
Tenor rapports medials na coopereschia la chanzlia betg cun ils investigaders. L’interpresa retardeschia las examinaziuns, ha rapporta la gasetta «La Prensa» sa referind sin ils investigaders. Er autras medias han rapporta a moda sumeglianta.
Mossack Fonseca refusescha las renfatschas. Sin lur chanal da Twitter communitgescha la chanzlia:
Davant las localitads da Mossack Fonseca a Panama-City è sa postada la polizia il mardi. Ils collavuraturs èn vegnids escortads en in bajetg annex. La polizia ha er intercurì il center da datas da l’interpresa da telefon che reglescha il support d’informatica da la chanzlia.
Tschertgar fastizs pervi d’enguladitsch
La chanzlia sa chatta èn il center da las scuvertas dals «Panama Papers». Tenor ils rapports duai Mossack Fonseca per part avair fundà firmas da chascha da brevs.
La chanzlia da sia vart refusa d’esser involvida en fatschentas illegalas. Ella è da l’opiniun d’esser daventada unfrenda d’in’attatga da hackers ed ha purtà plant. Il glindesdi aveva la procura publica perquai tschertgà pussaivels fastizs d’enguladitsch da datas en las localitads da la firma.
RR novitads 09:00