Siglir tar il cuntegn

Header

policist
Legenda: Investigaders franzos han chattà in segund auto dals attentaders en l'ost da Paris. Keystone
cuntegn

Exteriur Chattà ulteriur auto dals attentaders

En Frantscha è vegnì chattà in segund auto dals attentaders da Paris, tenor ils investigaders pudessan quels anc esser en fugia.

En l'ost da Paris han investigaders franzos chattà in segund auto dals attentaders probabels. Tenor ils experts munta quai ch'i saja reussì da fugir ad in dals 3 commandos da terror. Uschia rapporta l'emettur franzos, Europe 1.

L'auto saja probabel vegnì duvrà dals terrorists ch'han sajettà enturn en plirs cafés ed ustarias. Betg cler resta sch'ils delinquents èn vinavant en fugia u sche quels èn gia vegnids arrestads sonda passada en Belgia.

Attentaders èn eventualmain vegnids sco fugitivs en l'Europa

Dus dals attentaders da Paris èn eventualmain viagiads sco fugitivs sur la Grezia en l'Europa. Il possessur dad in pass sirian ch'è vegnì chattà tar in dals attentaders mort saja vegnì l'entschatta october sur l'insla Leros en l'UE, ha declerà la regenza ad Athen.

Tar l'entrada en il pajais hajan ins prendì las improntas dals dets. In segund terrorist saja probablamain vegnì sur la Tirchia e la Grezia. Ils pass e las improntas dals dets stoppian anc vegnir cumparegliads cun las baras. Ils documents pudessan esser engulads u cumprads.

Polizia arresta pliras persunas en Frantscha ed en Belgia

En Frantscha ha la polizia entant arrestà plirs parents dad in dals attentaders da terror a Paris, quai rapporta l'agentura da novitads AFP sa referind sin ils investigaders.

Plinavant saja vegnì controllà pliras abitaziuns. Ordavant eran gia almain 3 persunas vegnida arrestada en Belgia. Sco reacziun sin la seria d'attatgas ha il pajais prendì mesiras pli rigurusas per occurrenzas grondas. Pervi dad ina smanatscha directa vala entant il pli aut stgalim d'alarm da 3, quai ha la regenza communitgà suenter ina sesida dal cussegl da segirezza.

Mario Gattiker, il secretari statal per migraziun.
Legenda: Mario Gattiker, il secretari statal per migraziun Keystone
Las autoritads controlleschan tut quai ch'è pussaivel.
Autur: Mario Gattikersecretariat statal per migraziun

Il secretari dal stadi per migraziun svizzer Mario Gattiker ha entant reagì sin las temas ch'i pudessi er dar terrorists tranter ils requirents d'asil. Tut ils requirents d'asil che vegnian surdads als chantuns sajan vegnids registrads ed identifitgads, ha ditg Gattiker envers la «SonntagsZeitung».

Las autoritads controlleschian tut quai che saja pussaivel. Dossiers pli delicats vegnian plinavant surdads al servetsch secret. La cumpletta vita precedenta dals requirents d'asil na possia però betg vegnir sclerida.

«Nus n'avain nagina tema» ès'i stà da leger sin ils placats ch'èn vegnids deponids sin la Place de la République.
Legenda: «Nus n'avain nagina tema» ès'i stà da leger sin ils placats ch'èn vegnids deponids sin la Place de la République. Keystone

Tschients da persunas sa rimnan sin la Place de la République

La sonda saira èn tschients da persunas sa radunadas a Paris sin la Place de la République per mussar solitaritad e cumpassiun cun las unfrendas da las attatgas.

Malgrà il scumond da sa radunar sin plazzas publicas èn las persunas sa gruppadas sut il monument per il simbol naziunal «Marianne» per laschar enavos messadis sin scrits, placats e transparents. «Nus n'avain nagina tema« èsi stà da leger. U er «Nus essan la republica» u «Nossa libertad vegn adina ad esser pli ferma che lur terror».

NATO avertescha da discurer da «guerra da religiun»

Suenter la seria d'attatgas da terror ha il secretari general da la NATO Jens Stoltenberg avertì da discurrer dad ina guerra da religiun. Quai na saja nagin cumbat tranter il mund islamic ed il vest.

Jens Stoltenberg, il secretari general da la NATO.
Legenda: Jens Stoltenberg, il secretari general da la NATO. Keystone
Quai n'è nagin cumbat tranter il mund islamic ed il vest.
Autur: Jens Stoltenbergsecretari general da la NATO

I saja in cumbat d'extremists e criminals cunter umans che crajan vid las valurs fundamentalas sco pasch ed il respect dals dretgs umans, uschia Stoltenberg. Ussa saja impurtant da punctuar quant fitg ch'ins condemneschia ils acts da sgarschur e las attatgas sin umans innocents a Paris.

Ina Svizra sa chatta tranter ils blessads

Tranter ils blessads da las attatgas sa chatta er ina Svizra, sco quai ch'il departament federal per fatgs da l'exteriur ha fatg a savair. I na dettia però nagins indizis che Svizzers u Svizras pudessan esser tranter ils morts.

Tenor la bilantscha ad interim da la procura publica èn almain 129 persunas vegnidas mazzadas, 352 ulteriuras èn vegnidas blessadas tar las attatgas en la chapitala franzosa.

RR novitads 06:00/12:00

Dapli da Exteriuravrir la Landingpage

Nach links scrollen Nach rechts scrollen