Siglir tar il cuntegn

Header

cuntegn

Exteriur Chattar culpabel da Berlin cun agid da populaziun

Il delinquent ch’ha glindesdi mazzà sin ina fiera da Nadal a Berlin almain 12 persunas cun in camiun è anc adina sin la fugia. Uss speran ils investigaders sin l’agid da la populaziun: Sin in portal online pon perditgas inoltrar fotos u videos dal lieu da l’attatga. La metoda n'è però betg nova…

Gia il 2013 avevan investigaders gì success cun questa metoda, numnadamain suenter l’attatga al maraton da Boston en ils Stadis Unids da l’America. Suenter che duas bumbas eran siglientadas ils 15 d’avrigl, trais persunas eran vegnidas mazzadas e 176 blessadas.

Da lez temp era Edward Davis schef da la polizia da Boston. El era persvadì ch’i stoppia dar fotos u videos da l’attatga, gea forsa schizunt dal(s) delinquent(s).

audio
Mezdi: Populaziun sa gida a chattar delinquent – exempel Boston 2013
ord Actualitad dals 21.12.2016.
laschar ir. Durada: 2 minutas 9 Secundas.

12'500 documents aifer 24 uras

Ils investigaders han lura dumandà la populaziun per agid, ed èn vegnids inundads cun material visual, uschia Davis envers Radio SRF. En cifras: 12’500 documents aifer 24 uras ha il FBI survegnì.

L’evaluaziun d’ina tala fulla da datas dovra bler temp e persunal. Ma suenter bun quatter dis aveva la polizia arrestà respectivamain mazzà ils dus delinquents, dus frars. Tenor Davis na fiss quai betg stà pussaivel senza l'agid da la populaziun.

Maletgs manipulads impedeschan investigaziun

L’anteriur schef da polizia da Boston Davis avertescha dentant era: In u l’auter haja derasà faussas fotografias, er talas manipuladas cun l’agid da Photoshop. Auters hajan empruvà sez da tschertgar ils attentaders via medias socialas.

Talas acziuns persunalas hajan impedì las investigaziuns. Sco resultat sajan er innocents vegnids suspectads, concluda Davis.

RR actualitad 12:00

Artitgels legids il pli savens