Las Viafiers federalas svizras scusseglian – fin e cun la fin d’emna - dad ir cun il tren en Frantscha. Quai pervi da la chauma dal persunal da viafier franzosa che cumenza damaun. Singulas colliaziuns cun il TGV da Genevra a Paris crodian ora gia questa saira, ha communitgà l’SBB. Damaun circuleschia be ina colliaziun tranter Basilea e Paris.
Tut ils auters trens da TGV crodan ora. Annullads èn era sgols da diversas societads aviaticas da e vers la Frantscha. Era il traffic regiunal tranter la Svizra e la Frantscha saja ferm pertutgà. Cun lur chauma sa dostan pliras gruppas professiunalas en Frantscha cunter la refurma da rentas dal president Emmanuel Macron.
RTR novitads 20:00