Siglir tar il cuntegn

Header

cuntegn

Exteriur Chauma generala culminescha en violenza

Demonstrants han envidà plirs bus a Rio de Janeiro. A São Paulo ha la polizia duvrà gas lacrimogen e projectils da gumma cunter ils demonstrants. En l'entir pajais sajan radund 40'000 persunas sa participadas a la chauma cunter ils plans da spargn dal president Michel Temer.

En numerusas citads han las protestas paralisà e bloccà la vita publica. Bleras scolas e bancas èn restadas serradas. En la chapitala Brasìlia haja la polizia serrà las entradas tar edifizis da la regenza. En blers lieus èn las protestas l'entschatta restadas paschaivlas.

Chasa dal president sco mira

A São Paulo èn las protestas escaladas suenter che demonstrants hajan empruvà d'entrar il domicil dal president Temer. La polizia ha sinaquai duvrà granatas tschorventantas e projectils da gumma. Ils demonstrants han bittà crappa sin la polizia, han envidà fieu ed han stuschà blocs da betun en via.

Er a Rio de Janeiro avevan las protestas cumenzà paschaivlamain. Dentant èsi era là rut or in tumult. Gruppas da demonstrants hajan cumenzà a rumper las fanestras da bancas, han blocca vias cun barricadas ed han envidà almain otg bus. Il president, Temer ha crititgà fermamain questas acziuns.

Demonstrà han las citads perquai che Temer vul schelar en las expensas publicas dal stadi per ils proxims 20 onns. El planisescha era ina refurma dal sistem da rentas. La Brasilia sa chatta il mument en ina recessiun fitg ferma.

Spargnar tar ils paupers

Temer vul sanar la cassa dal stadi cun spargnar uschia. Ma ses adversaris rinfatschan ad el da pegiurar uschia anc pli fitg las finanzas dal sectur public ch'è schon uschia en ina schleta situaziun. Quai tutgass sur tut ils pli paupers ch'èn avisads sin ils programs dal stadi.

RR novitads 06:00

Artitgels legids il pli savens