Legenda:
François Hollande (san.) ha discurrì d'in pass impurtant vers la cunvegna tschertgada.
Keystone
cuntegn
Exteriur - Chaussa communabla da Frantscha e China a conferenza da clima
A la conferenza da clima a Paris sa stentan la Frantscha e la China per ina cunvegna ambiziusa e lianta. Ils presidents François Hollande e Xi Jinping han concludì il glindesdi a Peking da lavurar communablamain per il success da la conferenza.
Sco pli grond emittent da gas nuschaivel per il clima è la China in actur central da l'inscunter dal clima da l’ONU ch’ha lieu il december. Da las empermischuns dal pajais dependa era il cumportament dad ulteriurs impurtants pajais.
A la conferenza sa participeschan dapli che 190 stadis e contracteschan sur d'ina cunvegna per reducir las emissiuns da gas en l'entir mund.
La decleranza communabla da Hollande e Xi Jingping prevesa che quels che suttascrivan la cunvegna duain vegnir examinads mintga 5 onns per guardar, schebain els èn sa tegnids vidlonder.
