Il minister da l'exteriur Rex Tillerson è sin visita a Peking en China. Ins veglia tschertgar ensemen soluziuns per metter ord forza il privel dal program d'atom e da rachetas, ha el segirà envers il minister da l'exteriur Wang Yi. Er quel ha confermà ch'ils discurs sajan sincers e constructivs.
Discurs cun Corea dal nord han fatg naufragi
Tut ils discurs ch'èn vegnids manads cun la Corea dal nord davart il program da rachetas ils ultims 20 onns han tenor ils Stadis Unids fatg naufragi. Tenor Washington dovri in'autra via per schliar il problem damai che la Corea dal nord pudess baingleiti posseder ina racheta intercontinentala che pudess er cuntanscher ils Stadis Unids. En la Corea dal Sid ha Tillerson perquai declerà che la pazienzia stoppia vair ina fin. Tuttas opziuns, inclusiv militaras sajan sin maisa.
Ina finamira cuminaivla
La suletta finamira cuminaivla da la China ed ils Stadis Unids è ch'i na vulan naginas armas atomaras en ils mauns da Kim Jong Un. Els teman dentant in'escalaziun exact uschè ferm sco in collaps dal reschim. Las consequenzas fissan fugitivs e forsa la reuniun da la Corea dal nord e dal sid, là fissan dentant tuttenina truppas americanas avant porta da la China.
RR novitads 11:00