Siglir tar il cuntegn

Header

Navigaziun

cuntegn

Exteriur China na lascha betg sgular la Boeing 737 Max

Societads aviaticas da la China na dastgan betg pli sgular cun aviuns dal tip Boeing 737 Max 8. Quai suenter ch’in aviun da tal model è crudà giu dumengia en l'Etiopia. I saja gia la segunda disgrazia cun in aviun da quest tip entaifer curt temp, ha l’uffizi d’aviatica da la China CAAC fatg attent.

Aviun da la societad Ethiopian.
Legenda: La Boeing 737 Max 8 resta sin terra: suenter ch'i ha dà duas disgrazias aifer curt temp han Societads aviaticas da la China dà ora in scumond da partenza. Keystone

La Boeing 737 Max è il pli nov model da l'aviun da lingia ch'è vegnì vendì il pli savens sin l'entir mund. Suenter l'emprim sgol il schaner 2016 ha il construider d'aviuns dals Stadis Unids furnì avant dus onns las primas maschinas cun motors che dovran spezialmain pauc carburant. Fin la fin da schaner èn vegnids ordinads 5'011 aviuns, da quels èn 350 aviuns gia furnids.

Dus accidents aifer curt temp

L’october èn 189 persunas mortas en l'Indonesia. La Boeing 737 MAX 8 era sin viadi en l'intern da l'Indonesia: Ella era partida da Jakarta per il sgol da radund in'ura sin l’insla Bangka. Curt suenter la partenza haja il pilot dumandà da pudair turnar pervi dad in problem a bord. L'aviun è crudà en la mar.

Tar la crudada da l'aviun dad ier hai dà 157 unfrendas. La maschina dal tip Boeing 737 era da viadi da Addis Abeba a Nairobi, la chapitala da Kenia. Curt suenter il start saja il contact sur func vegnì interrut. L'aviun era nov e saja stà en funcziun tar Ethiopian Airlines dapi il november passà.

RR novitads 06:00