Siglir tar il cuntegn

Exteriur China: Ueli Maurer sin tura da reclama

Il minister da finanzas vul far reclama per la plazza da finanzas svizra en China. El vegn accumpagnà d'ina delegaziun ord la branscha da finanzas, tranter auter dal schef da la banca UBS, Sergio Ermotti.

Ueli Maurer en China.
Legenda: Ueli Maurer en China. Keystone

Envers la televisiun svizra SRF ha ditg Ermotti, che la politica e l'economia privata hajan in'impurtanta rolla enten collavurar. Sa preschentar als Chinais en questa constellaziun fetschia pli credibels els.

Maurer s'inscuntra en China tranter auter cun il minister da finanzas e cun represchentants da la banca centrala.

Confederaziun cun rolla activa

Quai è l'emprima giada ch'il Cussegl federal surpiglia ina rolla talmain activa en la promoziun da la plazza da bancas svizra. La Svizra vul sustegnair la China che ha la finamira da far vegnir pli internaziunala sia munaida, il Renminbi. Ella tschertga perquai in'alternativa.

Damaun va la delegaziun da Ueli Maurer vinavant a Shanghai e lura a Singapur ed a Hongkong.

RR novitads 20:00