Il lockdown vala almain enfin mez favrer. La nova varianta dal coronavirus sa derasia rasant, ha ditg Johnson en la televisiun. Ord quest motiv stoppian ins er agir en l'Engalterra e far il pass en il lockdown.
«Quai vul dir che vus stuais star a chasa»
Las scolas restan serradas – inscunters privats vegnan limitads ed er ustarias e fatschentas ston serrar lur portas.
Ils ultims dis aveva la Gronda Britannia annunzià in nov record tar las infecziuns e tar ils pazients. Il dumber da mortoris è creschì per 20%. Responsabel per quest svilup saja er la nova mutaziun dal coronavirus, uschia Johnson. Ella saja per 50 fin 70% pli infectusa.
Er la Scozia annunzia il lockdown
Gia il glindesdi suentermezdi aveva la Scozia annunzià da far a partir dad oz mardi il pass en il lockdown. Las parts da la Gronda Britannia fan mintgamai in’atgna politica da corona: en Scozia pon vegnir decididas autras mesiras ch'en l'Engalterra.
