Exteriur - Clera victoria per partida da la regenza
En l’Aserbaidschan gudogna la partida regenta «Nov Aserbaidschan» las elecziuns parlamentaras. Suenter avair dumbrà las bleras vuschs, possia la partida dal president Ilham Aliyev quintar cun almain 70 dals 125 mandats. Quai communitgescha la cumissiun electorala.
Las partidas da l'opposiziun han per gronda part boicottà las elecziuns. Tenor indicaziuns d'organisaziuns per la defensiun dals dretgs umans n'hajan politichers da l'opposiziun betg pudì sa participar al cumbat electoral. L’organisaziun per la segirezza e la collavuraziun en l'Europa OSCE n'ha gnanc tramess observaturs en il pajais.
