La tensiun era gia grond’avunda senza: Ils sajets mortals sin policists a Baton Rouge procuran per quitads davart la segirezza al di da nominaziun da partida dals republicans americans. A Cleveland en il stadi federativ Ohio èn giast radund 50’000 persunas fin gievgia. Al di da «National Convention» duai il mogul d’immobiglias Donald Trump uffizialmain vegnì nominà sco candidat per il presidi dals Stadis Unids.
Prontezza d’alarm augmentada suenter Baton Rouge
La halla nua che la dieta ha lieu fa la parita d’ina fortezza. Las vias tar la halla èn bloccadas cun barrieras da cement, sur la citad sgolan helicopters da polizia.
La dumengia èn trais policists vegnids mazzads a Baton Rouge (Louisiana), trais èn vegnids blessads. L’atmosfera en ils Stadis Unids era gia avant zunt tendida en blers lieus. Quai pervi da la mort da dus nairs tras la polizia e tschintg policists mazzads. Vitiers vegn a Cleveland ch’ì na po betg vegnir scumandà da purtar visiblamain armas en l’Ohio.
Emprims protests cunter Trump
A Cleveland hai dà l'emprima demonstraziun cunter il probabel candidat republican per il presidi american Donald Trump.Ils participants han crititgà Trump sco «chapitalist tschuff». La vita dals nairs e la vita dals immigrants quintia, uschia ina da las parolas.
La demonstraziun saja stada paschaivla, uschia meds da massa. Radund 100 demonstrants d’orientaziun vers la sanestra han protestà cunter rassissem e la violenza cunter la polizia.
RR novitads 06:00+
