Co èn ils Franzos propi?
- Il cliché di ch'els èn smarschuns, mangian e baivan bler, èn buns en letg e romantics. Ma cun dumandar ils Franzos sez na vegn nagut da quai. Els sajan lavurus e savens punctuals. Na, forsa betg tuts, ins stoppia far la differenza tranter il sid ed il nord. Quels dal nord sajan probabel in zic pli disciplinai che quels en il sid. Baterlunas sajan las dunnas - ellas hajan dentant er in charme ed in chic ch'ins sappia tschertgar sin l'entir mund.
Tge mangian ils Franzos propi?
- Il cliché di ch'ils Franzos mangian be lindornas u chaluns da raunas u autras curiusas chaussas. Tge che saja en scadin cas vair è ch'ils Franzos mangian e baivan fitg gugent. I saja in ritual, seser ensemen, baiver, mangiar e giudair la cumpagnia. Cler ch'ins mangia er autras chaussas che lindornas, il baguette saja gea er fitg enconuschent. Il vin lez na dastgia dentant betg mancar.
Èn tut ils Franzos romantics e buns en letg?
- Il cliché di ch'ils Franzos èn tuts buns en letg e sa chapescha romantics. La finala è lur chapitala Paris gea er la chapitala da l'amur. Sin quai cliché datti savens ina risada dals dumandads. Tgi na prenda betg uschè serius e manegia: Cler, tut ils Franzos èn stalluns en letg! Ils blers manegian dentant che quai saja be in cliché. Tge che saja dentant plitost vair e ch'ils Franzos èn romantics, i saja vair ch'els sajan forsa in zic pli sentimentals ch'auters.
En ils Franzos smarschuns?
- Il cliché di ch'ils Franzos lavuran be 35 uras l'emna, han sis emnas vacanzas ad onn e cu els avessan da lavurar fan els chauma. Quella pretaisa vegn immediat negada cun gronda indignaziun. Quai na saja insumma betg vair en tut ils dumandads da l'avis. Ins lavuria fitg bler, savens dapli che quellas 35 uras e na saja insumma betg marschs. Quai cun la chauma sto in u l'auter dentant laschar valair, quai saja schon insatge tipic franzos.
RR actualitad 11:00