Il schef da la conferenza en la Pologna, Michal Kurtyka, ha sigilà il cumpromiss dal plenum cun ina martellada. Durant duas emnas han ils represchentants da 196 pajais e da l'UE cumbattì per las reglas. Atgnamain avess la conferenza dal clima da l'ONU stuì esser a fin gia il venderdi saira.
Organisaziuns da l'ambient vesan las reglas fixadas sco impurtanta basa per la politica da clima internaziunala. Dals ulteriurs resultats da la conferenza sajan els dentant dischillus, en vista al stgaudament da la terra che cuntinueschia. Finamira da la cunvegna da Paris è, da limitar il stgaudament cleramain sut dus grads. Per cuntanscher quai stuess ins reducir drasticamain las emissiuns che derivan dal charvun e da l'ieli brischà.
Reacziuns svizras
Per la delegaziun svizra sajan las reglas fixadas suffizientas – per cuntanscher la transparenza necessaria che gidia da realisar bain la cunvegna da Paris, ha communitgà l'Uffizi federal d'ambient.
Era dètg cuntent s'exprima il WWF cun il resultat da la conferenza. Dentant gist il chapitel cun il commerzi dispitaivel cun certificats da clima restia avert, scriva il WWF. E la Svizra mettia sco in da paucs stadis in accent fitg ferm sin quests certificats, enstagl da reducir en l'agen pajais il consum d'ieli e da gas natiral.
RR novitads 23:00++
