Siglir tar il cuntegn

Header

cuntegn

Exteriur Clinton e Trump marschan direcziun candidatura

Nair sin alv n’èsi anc betg, dentant la tendenza è clera suenter il «Super Tuesday»: Hillary Clinton daventa probabel candidata dals democrats e Donald Trump quel dals republicans. Sch’i vegn propi tar quest duel èn las retschertgas da l’avis che Clinton daventa presidenta.

E malgrad ch’i è anc betg cler sch’els vegnan propi nominads, han els gia attatgà in l’auter en lur pleds da victoria la notg dal «Super Tuesday». Donald Trump crititgescha, che Clinton ditgia ch’ella fetschia tut meglier sch’ella daventia presidenta, n’haja dentant mai fatg insatge cura ch’ella era a la pussanza. Clinton da sia vart di cheTrump saja simplamian il fallì candidat per ils Stadis Unids.

7 stadis per Clinton, 7 per Trump

Tant la democrata Hilary Clinton sco er il republican Donald Trump han gudagnà en 7. Omadus candidats han uschia fatg in grond pass en direcziun da lur nominaziun per l'elecziun dal nov president american. Er lur persequitaders han però surprendì.

«Super Tuesday»

Avrir la box Serrar la box

Il di dals dis vegnan radund 20% da tut ils delegads surdads; 600 tar ils republicans e radund 1000 tar ils democrats. Per vegnir nominà sto in candidat republican vegnir sin almain 1237 vuschs, in democrats in 2383.

Tge candidats han gudagnà en tge stadis?

Ils democrats

  • Hilary Clinton : Georgia, Virginia, Tennesse, Alabama, Arkansa, Texas e Massachusetts.
  • Bernie Sanders: Vermont, Colorado, Minnesota ed Oklahoma.

Ils republicans

  • Donald Trump: Georgia, Massachussetts, Alabama, Tennessee, Vermont, Virginia ed Arkansas.
  • Ted Cruz: Texas, Alaska ed Oklahoma.
  • Marco Rubio: Minnesota

Clinton distanziescha Sanders

L'anteriura ministra da l'exteriur Clinton ha bain gudagnà en 7 stadis, ha ella stuì laschar 4 ulteriurs stadis a ses concurrent Bernie Sanders, ch'ha proclamà ina revoluziun politica.

Clinton ha però fatg la cursa en ils stadis pli gronds ed uschia gudagnà cleramain dapli vuschs da delegads.

Cruz n'è betg trumpà

Il miliardari d'immobiglias dispitaivel Trump ha gudagnà en 7 stadis, en il stadi impurtant da Texas ha però ses rival Ted Cruz dominà. A Texas vai per 252 delegads tar ils democrats, tar il republicans per 155. En blers stadis han Cruz e Rubio ensemen fatg cleramain dapli vuschs che Trump. Cruz ha perquai appellà da reducir il champ dals concurrents republicans.

La decisiun preliminara che blers han spetgà è cunquai anc ina giada spustada. Ils 8 ed ils 15 da mars datti danovamainpreelecziuns.

RR novitads 06:00

Artitgels legids il pli savens