Il segund duel en la televisiun a St. Louis tranter Hillary Clinton e Donald Trump - ch'aspireschan al presidi dals Stadis Unids - è stà dominà da diras reproschas dad omaduas varts.
Trump è in demagog.
Al cumenzament era il candidat republican Trump en la defensiva pervi da sias remartgas sexisticas da l'onn 2005 - ed el è sa mussà plain ricla. Clinton ha dentant declerà che las remartgas sajan tipicas per la persunalitad da Trump. Pervi da ses cumportament envers las dunnas na saja el betg adattà sco president dals Stadis Unids.
Affera d'e-mail sto avair consequenzas per Clinton.
Pli tard en il duel ha la democrata Clinton concedì d'avair fatg sbagls en connex cun e-mails durant ses temp sco ministra da l'exteriur. Trump ha sinaquai pretendì praschun per quest cumportament incorrect da Clinton.
Facit dal segund duel direct
La retschertga da l'emettur da televisiun CNN fatga suenter il duel mussa Hillary Clinton sco victura dal segund duel. Ella vegn sin 57% e Trump sin 34%. Cun sia tenuta offensiva ha Donald Trump fatg puncts tar sia atgna basa. Però n’èsi betg grategià ad el da gudagnar vitiers electurs intscherts. Uschia maina Clinton vinavant, malgrà che Trump è tenor l’opiniun d’experts stà meglier ch’anc en l’emprim duel en la televisiun.
Surpraisa avant il duel
Avant il segund duel en la televisiun aveva Donald Trump preschentà a las medias quatter dunnas che renfatschan a Bill Clinton abus sexual. L’anteriur president dals Stadis Unids ed um da Hillary Clinton haja violà ellas avant plirs decennis.
RR novitads 06:00