Siglir tar il cuntegn

Header

Navigaziun

cuntegn

Colonnas al Mount Everest 10 alpinists èn morts

Quest'onn èn gia 10 persunas mortas sin il pli aut culm dal mund. L'onn passà hai dà durant l'entira stagiun tschintg unfrendas sin il Mount Everest. Tenor observaturs pudess il grond dumber d'unfrendas avair in connex cun las colonnas al culm.

Pervi da l'aura pon ins be ir sin il Mount Everest durant paucas emnas la primavaira – da la fin avrigl enfin la fin matg. Avant diesch dis èn las relaziuns vegnidas bunas, uschia che blers alpinists han empruvà da cuntanscher il culm sin 8'848 meters sur mar, scrivan las agenturas da novitads. Cunzunt la mesemna passada haja dà colonnas sin ils ultims meters.

collonna sin il culm mount everest.
Legenda: (maletg da simbol dal 2013). Keystone

Pervi da las bunas relaziuns levian tuts alpinists ed alpinistas conquistar il Mount Everest il medem mument, ha in manager da l'agentura da trekking Peak Promotion ditg. Uschia hai dà colonnas en l'uschenumnada zona da mort sur 8'000 meters sur mar – colonnas lungas e fitg privlusas.

Dad ir u da turnar dal Mount Everest èn 10 persunas mortas. Ulteriurs diesch alpinists sajan morts sin auters culms pli auts che 8'000 meters en il Himalaya.

10'000 francs

Per dastgar viandar sin il Mount Everest ston alpinists dal exteriur pajar fin 10'000 francs. Per Nepal è il turissem al Himalaya in'impurtanta funtauna d'entradas.

RR novitads 14:00