Siglir tar il cuntegn
cuntegn

Exteriur Columbia: Attentat fa fin a process da pasch

Il president Columbian Iván Duque na veglia betg pli discurrer da pasch cun ils guerillas da la FLN, scriva l’agentura da novitads SDA.

Portrait durant discurs.
Legenda: Terminà ils discurs da pasch cun l'ELN – quai annunzia il president Columbian Iván Duque qua en la televisiun. Keystone

La regenza da la Columbia fa responsabla la gruppa da guerilla FLN per l’attentat da bumba sin in’academia da polizia a Bogotá. L’attentat ha custà la vita a 21 persunas e ferì ulteriuras 68.

Perquai haja il president Columbian Iván Duque activà puspè ils cumonds d’arrest cunter 10 negoziaders da la ELN. Quels avevan prendì part als discurs da pasch en la Cuba. L’armada da liberaziun naziunala FLN saja l’ultima gruppa da rebels activa en la Columbia, scriva la SDA.

In’autra lunga guerra da guerilla era vegnida finida il november 2016: Lura aveva il president Juan Manuel Santos, l’antecessur da Duque, fatg pasch cun ils guerillas da sanestra da la Farc. Per sias fadias da far pasch aveva Santos survegnì il november 2016 il Premi Nobel da la pasch.

RR novitads 12:00