Il concern da commerzi online Amazon vul stritgar passa 18’000 plazzas da lavur. Quai ha scrit il schef dal concern Andy Jassy en ina communicaziun a las collavuraturas e collavuraturs. Uschè bleras plazzas n’ha Amazon anc mai stritgà enfin ussa en si'istorgia. Amazon era vegnì fundà il 1994.
Prosperà e creschì durant pandemia – ussa vegn reducì
Il concern aveva annunzià quest pass gia il november e cumenzà a stritgar plazzas en las spartas d'apparats e prestaziuns da servetsch. Là aveva el però discurrì da 10’000 plazzas. La raschun: La blera glieud ch’il concern ha engschà ils ultims onns - surtut durant la pandemia - e la situaziun economica cun auta inflaziun e tscheins directivs che creschan.
Amazon dat lavur a 1,5 milliuns persunas sin l’entir mund che lavuran surtut en la structura da furniziun e deposit.
Betg mo Amazon – l'entira branscha patescha
Questa reducziun da plazzas tar Amazon è in mussament ch'il boom da lavur e plazzas en la branscha da tecnologia è a fin. Entant che las fatschentas marschavan bain e fitg bain durant la pandemia, patescha la branscha ussa da l'inflaziun e quitads per ina recessiun. Era tar Meta (cun Facebook, Instagram e Whatsapp) e Twitter hai dà undas da relaschadas. Ils ultims dis ha era il producider da programs Salesforce annunzià da stritgar 10% da sias radund 79'000 plazzas.
