Catastrofas dal clima èn la raschun principala daco che umans daventan fugitivs en l’agen pajais. Quai rapporta l’organisaziun d’agid Oxfam. Mintg’onn vegnian radund 20 milliuns persunas sfurzadas da bandunar lur chasas e tschertgar refugi entaifer lur pajais. Quai scriva l’organisaziun d’agid en ses rapport «Forced from home» a chaschun da la conferenza davart il clima da l’ONU a Madrid.
Las raschuns sajan en emprima lingia stemprads, inundaziuns ed incendis da guaud. Uschia hajan ins per exempel dumbrà il 2018 passa 1’500 da quellas catastrofas. Quai è circa otg giadas dapli catastrofas dal clima ch’anc l’onn 2012.
80% da tut ils fugitivs en l’agen pajais datti tenor rapport en l’Asia. Sco exempel numna Oxfam il Bangladesch e l’India suenter il ciclon «Fani» ch’aveva furià il matg e sfurzà 3,5 milliuns umans da bandunar lur chasas. En pli stima l'organisaziun d'agid ils donns economics tras catastrofas dal clima sin 2% da la prestaziun economica da l'entir mund.
RTR novitads 06:00