Siglir tar il cuntegn
Inhalt

Exteriur Conferenza dal clima: Sommaruga pretenda reglas liantas per tuts

La presidenta da la Confederaziun, Simonetta Sommaruga ha pretendì a la conferenza dal clima a Paris regals liantas per tut ils pajais. Sulet cun talas reglas possia la societad e la populaziun sa midar a moda persistenta.

Cordial bainvegni dal president franzos per la presidenta da la Confederaziun, Simonetta Sommaruga.
Legenda: Cordial bainvegni dal president franzos per la presidenta da la Confederaziun, Simonetta Sommaruga. Keystone

A la conferenza dal clima a Paris ha la presidenta da la Confederaziun, Simonetta Sommaruga avertì da las consequenzas ch’ina midada dal clima ha per il planet e per tut las societads. Er la Svizra saja pertutgada, e quai gia ussa direct cun ils glatschers che lieuian.

La Svizra veglia cuntanscher a Paris ina cunvegna che prevesia in augment da las temperaturas sin noss planet da maximalmain 2 grads. La cunvegna duaja er reparter las responsabladads ed ils pensums a moda gista, ha ditg Sommaruga.

Sumegliant sco il cumbat cunter il terrorissem

Er il president franzos, François Hollande ha appellà al cumenzament da la conferenza dal clima a Paris che quai giaja ussa per il futur dal planet. Ils proxims dis vegnian fatgas decisiuns che hajan ina influenza sur ils proxims decennis. Uschia na possia quai betg restar sulet tar ina decleraziun d’intenziun. I duai dar ina cunvegna lianta dal clima, ina che prevedia da limitar il stgaudament da la temperatura sin noss planet sin il pli per 2 grads.

François Hollande ha plinavant er congualà il cumbat cunter la midada dal clima cun il cumbat cunter il terrorissem. Las generaziuns che suondian, na stoppian betg mo vegnir protegidas dal terrorissem, mabain i saja er necessari da surlaschar in planet duraivel ad ellas.

China vul survegliar emissiuns via satellit

Entant ha la China annunzià da vulair survegliar en il futur las emissiuns da gas da serra or da l’orbit. Dus satellits duajan esser pronts la fin da matg, scriva l’agentura da novitads statala chinaisa. Vinavant haja il schef da stadi da la China Xi Jinping giavischà en il cumbat cunter la midada dal clima dapli solidaritad cun ils stadis en svilup.

Las relaziuns localas en mintga pajais duajan vegnir resguardadas. Bunas tecnicas per il clima duajan vegnir transferidas en ils pajais da svilup, ha ditg Xi Jinping.

Var duas emnas temp

Var duas emnas fatschentan ils gas da serra e la stgaudada globala ils represchentants da 195 pajais. Il secretari general da l'ONU Ban Ki Moon ed il president franzos François Hollande han beneventà oz var 150 schefs da stadi e schefs da regenza che prendan part al cumenzament da la conferenza. Betg cler è quant lianta ed ambiziusa che la cunvegna planisada vegn a gartegiar.

RR novitads 15:00/17:00