Plirs pajais europeics han appellà a la Russia da far pass per deescalar il conflict en l'Ucraina. Quai ha communitgà il pledader da la regenza tudestga suenter ina conferenza da video da schefs da regenza e stadi ensemen cun ils Stadis Unids da l'America.
Appel da deescalar, uschiglio consequenzas gravantas
Ins saja s'accordà ch'ina attatga russa sin l'Ucraina avessia consequenzas gravantas. Ins prefereschia però ina schliaziun diplomatica dal conflict, han puntuà tranter auters il president american Joe Biden ed il chancelier federal tudestg Olaf Scholz.
Al discurs han fatg part schefs da stadi e da regenza da la Germania, la Frantscha, la Gronda Britannia e dals Stadis Unids. Era stads colliads èn la presidenta da la cumissiun da l'Uniun europeica (UE) Ursula von der Leyen, il president dal cussegl da l'UE Charles Michel ed il secretari general da la NATO Jens Stoltenberg.
USA e NATO mobiliseschan era
Entant han ils Stadis Unids da l'America mobilisà 8500 schuldads pervia dal conflict en l'Ucraina. Ina decisiun davart in spustament definitv da questas truppas en l'Europa na saja però anc betg crudada, communitgescha il ministeri da defensiun american.
Ordavant aveva gia la NATO annunzià da rinforzar sia preschientscha militara en l'Europa da l'ost. Sco reacziun sin la mobilisaziun da las truppas russas al cunfin ucranais tramettia l'allianza ulterius bastiments da guerra e jets da cumbat en la regiun, hai gì num.
In conflict vegl che s'accentuescha
Il vegl conflict tranter l'anteriura commembra da l'anteriura Uniun da las republicas socialisticas sovieticas (USSR) è vegl. Dapi che l'USSR è ida en paglia il 1991 è l'Ucraina stada autonoma. Las pli novas tensiuns èn sa sviluppadas il 2013 ord protestas da la populaziun, suenter che la regenza ucranaisa aveva da lezzas uras refusà da suttascriver la cunvegna d'associaziun a l'UE. Il 2014 aveva la Russia lura annectà la peninsla ucranaisa Crim – e controllescha ussa lezza e pliras parts da l'Ucraina da l'ost.