Siglir tar il cuntegn

Exteriur Conjunctura russa sfundra vinavant

En la Russia va l'economia zop. Ils emprims 5 mais da quest onn è il product intern brut sa reducì per 3,2%. Tenor il minister d'economia Alexej Uljukajew vegn la conjunctura a cuntinuar la via engiu.

Il curs da stgomi dal rubel envers il dollar e l'euro resta sin livel bass.
Legenda: Il curs da stgomi dal rubel envers il dollar e l'euro resta sin livel bass. Keystone

Uljokajew spetga per l’economia russa anc menders temps. Uschia vegnia la prestaziun economica a sfundrar sin 3,5% fin 4% per il terz quartal. Per la fin da l’onn 2015 vegnia spetgà ina reducziun da 2%.

Sancziuns economicas dal vest spossan economia Russa

L'economia russa patescha da las sancziuns economicas dal mund dal vest en connex cun il conflict en l'Ucraina e dal pretsch d'ieli bass. Anc mesemna avevan ils stadis da l'Uniun europeica prolungà las sancziuns economicas cunter la Russia fin il december. Per l'autra primavaira quinta la Russia ch'i giaja puspè ensi.

Putin è optimistics

Il president russ Vladimir Putin relativescha però la cris’economica. La situaziun saja stabilisada e la dumonda per il rubel s’augmentia. Putin ha accentuà che blers hajan spetgà ina greva crisa che na saja dentant betg succedida.

RR novitads 14:00