Siglir tar il cuntegn

Exteriur Consternaziun en Belgia suenter assagl mortal

Suenter l'assagl mortal saja la Belgia schoccada da l'act brutal, scrivan las agenturas. Il mardi saira ha ditg il schef da la polizia da Lüttich, che l’um na vuleva betg far in’attatga d’amoc. El haja vulì «tutgar policists, dimena l’instituziun, il stadi beltg», scriva l'agentura da novitads dpa.

Trais persunas consternadas.
Legenda: La consternaziun suenter l'assagl mortal dal mardi avantmezdi è gronda. Keystone

L'attatgader aveva attatgà il mardi avantmezdi l'emprim duas polizistas e sajettà ellas cun l'arma dad ina dad ellas. Suenter haja el sajettà in um, che seseva en in auto, e saja mitschà en ina scola. Là è l'attatgader vegnì sajettà en in sajettim da la polizia, en il qual che dus ulteriurs policists èn vegnids blessads. Quai rapporta la sda sa basond sin las indicaziuns da la procura publica beltgesa.

Investigaziuns sin il lieu.
Legenda: La polizia investighescha al lieu dal sajettim a Lüttich en Belgia. Keystone

Betg confermà, che l'attatgader ha clamà «Allahu Akbar»

Il mardi saira haja ditg il schef da la polizia da Lüttich, che l’um na vuleva betg far in’attatga d’amoc. El haja vulì «tutgar policists, dimena l’instituziun, il stadi beltg», scriva SRF.

En il decurs dal di avevan medias rapportà, che l'attatgader haja clamà «Allahu Akbar» (Dieu è grond) – quai n'è betg vegnì confermà enfin uss. Tuttina ha surprendì la procura publica speziala per acts terroristics las investigaziuns.

Publicitad beltga sensibilisada sin attatgas

Sin il servetsch da medias curtas Twitter aveva il minister da l'intern beltg scrit, ch'il center naziunal da crisa examineschia la situaziun. Actualmain restia l'admoniziun da terror per il pajais sin stgalin dus da quatter.

La Belgia era vegnida ils ultims onns en il focus da terrorissem islamistic. Tar l'attentat pli grev ils 22 da mars 2016 eran vegnidas per la vita 32 persunas en la metro ed a l'eroport da Brüssel. Pir dacurt era vegnida reducida l'admoniziun da terror sin stgalim dus tar il status attatgas «pauc probablas».

RR novitads 14:00+