Siglir tar il cuntegn

Header

Navigaziun

cuntegn

Consum da drogas Passa in mez milliun morts da drogas il 2017

Il 2017 han sin l'entir mund radund 270 milliuns umans consumà drogas sco cocain, opium u cannabis. A questa conclusiun vegn l'ONU en ses rapport da drogas mundial. Pervi da consum da drogas èn mortas bunamain 600'000 persunas.

Dapi l'onn 2009 è il dumber da persunas che consumeschan drogas creschì per 30%. Radund 5,5% da la populaziun mundiala, tranter 15 e 64 onns han prendì drogas il 2017. La droga duvrada il pli savens il 2017 è anc adina stà il Cannabis. Tenor l'ONU dettia radund 188 milliuns persunas che consumeschian questa droga.

Maximum istoric

Cun 2'000 tonnas ha er la producziun da cocain cuntanschì in maximum istoric. Quai saja in quart dapli che l'onn 2016. Radund 70% dal cocain deriva da la Columbia. Er la quantitad confiscada dal cocain ha cuntanschì il 2017 cun 1'275 tonnas in maximum istoric. Quai è in augment da 13% cumpareglià cun l'onn avant. Mundialmain consumeschian radund 18 milliuns persunas la droga, principalmain en America dal Nord e l'Europa.

Accessibel a moda memia simpla

L'experta da l'ONU, Angela Me declera quant impurtant ch'i saja da mantegnair l'equiliber. I saja impurtant che persunas che dovran per raschuns medicinalas ils opioids, hajan er access a quels. En ils Stadis Unids ed il Canada sajan las quests opioids dentant accessibels a moda memia simpla. Ch'i saja uschè simpel da vegnir tar tals medicaments saja ina raschun per la quala tantas persunas sajan dependentas, ha ditg Me.

RR novitads 06:00